Dende esta perspectiva, o proxecto ofrece á comunidade educativa os produtos da investigación, de xeito que poda converterse nun útil de traballo na aula e unha nova vía de coñecemento. A propia Web e, especialmente, a base de nomes con todas as súas posibilidades é en si mesmo un instrumento cunha importante vocación didáctica, mediante a cal se poden levar a cabo diversas propostas de traballo: o coñecemento da represión no concello onde se encontra o centro de ensino; o coñecemento máis pormenorizado dunha vítima en particular; recoñecer os apelidos das vítimas e poñelos en relación coa comunidade do presente; a represión en función do xénero, idade ou grupos socio-profesionais...

Pero ao mesmo tempo, ca fin de aportar algúns elementos didácticos de primeira man, que sirvan de apoio inmediato na aula, presentamos unha serie de materiais englobados nos apartados Materiais e Materiais elaborados

Materiais: proporciónase unha escolma o máis diversa posible de produtos derivados da investigación para ser utilizados de xeito independente na aula como apoio a unha explicación determinada: fragmentos de voz, fotos, documentos, mapas, gráficos...

Materiais elaborados: achéganse aquí un conxunto de materiais elaborados e estruturados dun xeito temático. Tres son as propostas que ofrecemos de inicio, aínda que se trata dun apartado aberto no que se podan ir incluíndo outras novas. Estas son: A represión en Galicia; A dimensión socio-profesional da represión; A memoria hoxe.

O proxecto solicita á comunidade educativa que se anime a elaborar diversas propostas didácticas. Así, profesores, ou alumnos dirixidos polo seu profesor, poderían realizar unha serie de unidades didácticas. Ben utilizando exclusivamente a información xerada polo proxecto, ben incrementando esta con novas pescudas.

O proxecto comprométese a divulgar cada un destas propostas didácticas en formato pdf, asinadas polos seus autores (profesores, alumnos ou ambos), nun apartado propio creado para tal fin. Ao mesmo tempo, a presentación de cada proposta irá acompañada dun apartado no que os autores podan explicar os pormenores do traballo levado a cabo, así como unha ligazón co blog da web do proxecto para facilitar unha posible comunicación entre os autores e os potenciais usuarios da súa proposta.

Existe a posibilidade de que algunhas destas propostas didácticas, atendendo a diversos criterios: calidade, orixinalidade... podan ser divulgadas na web do proxecto, ademais de no citado formato pdf, como unha proposta didáctica interactiva con novos recursos de utilización.