A familia Villaverde Otero cede a documentación histórica do sindicalista José Villaverde Velo á Real Academia Galega

José Villaverde Velo. 2185 Fondo Villaverde Otero

A familia Villaverde Otero cede a documentación histórica do sindicalista José Villaverde Velo á Real Academia Galega

Onte tivo lugar a cesión da documentación histórica do sindicalista José Villaverde Velo á Real Academia Galega, nun acto no que participaron as irmáns Mar y Luz e Olga Villaverde Otero e o presidente da Academia, Xosé Luís Méndez Ferrín. Cúmprese así un dos desexos dos familiares de Villaverde Velo: que a documentación de carácter político agochada durante a Guerra Civil e a ditadura franquista remate nun Centro Documental de carácter público accesible a toda a cidadanía interesada na historia do movemento obreiro galego e na represión franquista acontecida tralo golpe de estado de xullo de 1936.

En 2007 o Proxecto de Investigación “Nomes e Voces” púxose en contacto coas irmáns Villaverde Otero grazas á relación que o coordinador de Pontevedra Dionisio Pereira mantiña coa familia desde os anos setenta. Desde ese momento, os investigadores da universidade compostelá realizaron unha recompilación, catalogación e dixitalización de preto de 100 fotografías de carácter histórico, da correspondencia política de José Villaverde con líderes sindicais Galegos e estatais e de parte da súa biblioteca. Así mesmo, procedeuse á recuperación e posta a disposición pública dos xornais Solidaridad Obrera, Solidaridad, La Calle e Brazo y Cerebro a través da páxina web do grupo de investigación

Solidaridad Obrera e Solidaridad foron os voceiros, en diferentes anos, da Confederación Regional Galaica-CNT, editados na Coruña entre 1930 e 1936 –o primeiro deles até 1934 e o segundo de 1935 a 1936. O caso de La Calle é aínda máis significativo xa que esta é a única colección coñecida deste xornal sindicalista, editado nos primeiros meses de 1936 tamén na cidade herculina.

José Villaverde Velo nacera en Santiago de Compostela a comezos do século XX. En 1931 foi elixido secretario da Confederación Regional Galaica da CNT trasladándose por este motivo á Coruña. Nesta cidade coñeceu a Palmira Otero, a súa derradeira muller filla do vello sindicalista Joaquín Otero. Villaverde tiña dúas fillas dun matrimonio anterior, Fraternidad e Nieves Libertad; xunto a Palmira foron pais de Mar y Luz e Olga. Tralo golpe de estado de xullo de 1936, Villaverde é detido e, tras rexeitar dirixir ao sindicalismo vertical, foi asasinado o 25 de setembro de 1936 no concello de Arteixo . Os “papeis” de José Villaverde así como parte da súa biblioteca persoal foron soterrados nunha maleta pola familia nun solar da fábrica de zapatos de Senra na que estaban confinados Joaquín Otero e os seus fillos Eugenio e Joaquín. Na década de 1940 rescatárona e gardárona en varios domicilios da familia até que nos anos setenta varios investigadores puideron consultar por vez primeira a documentación. Con este acto, a familia Villaverde Otero pecha un ciclo persoal. Esta documentación, dun valor histórico excepcional, é depositada na RAG e accesible a todo sos interesados na súa consulta e estudo.  

Galerías de imaxes relacionadas

Novas relacionadas

Gardado en Noticias 28 de xuño de 2011 | sen comentarios

Sen comentarios

 

Subscribirse ao blog por rss

A navalla suíza
Responsable
Universidade de Santiago de Compostela
Colaboradores
Universidade de Vigo Universidade da Coruña Deputación de Lugo
Patrocina
Feder Xunta de Galicia
Deputacion da Coruña As Pontes de García Rodríguez