Nomes e voces

Os obxectivos do proxecto

O Proxecto de Investigación Interuniversitario "As vítimas, os nomes e as voces" fixou como obxectivo primordial a constitución dun espazo de investigación e documentación para o estudo histórico da represión desde o comezo da Guerra Civil até o fin da ditadura franquista en Galicia. Debía servir para acumular coñecemento sobre un pasado que precisa esclarecemento, ao tempo que para fundamentar a reflexión e arrequentar o patrimonio histórico e cultural do país con memorias, documentos e materiais doutro xeito abocados a perderse. Deste xeito, pretende responder desde o ámbito da historia a unha demanda de recuperación das memorias aínda ocultas, con tres obxectivos:

• Elaboración dunha relación de nomes das vítimas da represión en Galicia no período da Guerra Civil (1936-1939) atendendo o estudo de fontes escritas da época (causas militares, rexistros de prisións e rexistros civís), fontes orais (relato dos propios represaliados aínda vivos ou dos seus familiares máis achegados) e estudos locais existentes. Para sistematizar toda esta información, elaborouse unha base de datos onde se recollen os nomes e a traxectoria vital dos afectados.
• A realización dun plan de entrevistas para recoller a memoria da represión en Galicia. Pola súa avanzada idade, o principal foco de atención son os protagonistas superviventesda época, seguidos dos familiares directos. Para a súa sistematización tamén se crearon bases de datos específicas que estarán á disposición da sociedade.
• No camiño de rescatar lugares da memoria oculta, búscase achegar un coñecemento exhaustivo de todos os lugares nos que se sufriu a represión en Galicia. Isto concretarase no cartografado da represión que inclúa a distribución espacial e nunha análise dos lugares que se converteron en escenarios máis relevantes da represión.

Desde o Proxecto tamén se foi establecendo como obxectivo prioritario a recuperación da documentación que existe sobre a represión e as familias que a padeceron. Deste modo estase a recuperar un grande número de materiais documentais que son procesados axeitadamente para facilitar o acceso directo aos investigadores e ao público interesado.

O coñecemento e a pescuda que os investigadores do proxecto están a realizar coa documentación recollida serve como contribución ao debate científico a través das vías convencionais e das que poidan deseñarse: encontros, seminarios, publicacións de resultados en diferentes formatos, presencia na rede, etc..

O produto das investigacións será un recurso público de investigación e máis un instrumento ao servizo de familiares e interesados e, por suposto, da administración