Vermellas. Chamábanlles "rojas"

Xulgadas sen xustiza

Aínda que foron moitas as mulleres asasinadas en Galicia durante a guerra civil e a posguerra, moi poucas foron fusiladas tras ser xulgadas en consello de guerra, pois as restantes pereceron abatidas sen ningunha clase de xuízo, xeralmente tras ser secuestradas e paseadas. Polo demais, os xuízos militares foron farsas sen ningún tipo de garantía procesual. 


Consuelo Alonso González, chamada A Comunista, humildísima vendedora de xornais en Monforte de Lemos, casada e con catro fillos, foi detida e rapada en 1936 polas súas ideas esquerdistas, pero logo foi encarcerada, procesada e finalmente fusilada en Lugo o 13 de maio de 1938.

Chámase Consuelo,
ninguén a consola
e chámanlle A Comunista.

Con insidia xúlgana
polo que din que dixo
e seguen chamándolle A Comunista.

Condenárona soa,
fusilárona soa,
enterrárona soa,
esquecérona soa...
E aínda lle chaman A Comunista!

A comunista mugardesa Amada García Rodríguez foi encarcerada durante o seu embarazo e fusilada aos vintesete anos con outros compañeiros na prisión militar de Ferrol o 27 de xaneiro de 1938, tras despedirse do seu pai, do seu marido e do seu fillo acabado de nacer, que puideron sentir a descarga da súa execución na embarcación que os trasladaba a terra dende o Castelo de San Felipe.

Pecharon a amada Amada
de costas á libre ría.
Baluartes de hornabeque
aprisionaron a cría.

Escoitaron os disparos
os tres que tanto a querían.
Filliño, marido e pai
no barco que a despedía.

Mataron a filla de un
e a nai do que entón nacía.
Mataron a compañeira
de nome Amada García.

Foi vítima da vinganza
de quen para si a quería.
O prezo da súa beleza
encheu de sal a baía.

Ata o polbo de Mugardos
ergue os seus brazos na ría.
Para todos será praza
da vila mortal un día.

Loitou por social xustiza
co puño que o pobre erguía.
Cría na fraternidade
e na igualdade ela cría.

Lembramos os compañeiros
que con ela alí morrían.
Mataron a amada Amada,
mais vive Amada García.

A navalla suíza
Responsable
Universidade de Santiago de Compostela
Colaboradores
Universidade de Vigo Universidade da Coruña Deputación de Lugo
Patrocina
Feder Xunta de Galicia
Deputacion da Coruña As Pontes de García Rodríguez