Terceira circular do Congreso Internacional "1936 ¿Un novo relato? 80 anos, entre historia e memoria". Compostela, 18,19 e 20 de xullo de 2016

Deste xeito, historiografía e estudos literarios, dous ámbitos de coñecemento que se ocupan da Memoria,pretenden dialogar neste foro que se concibe como unha ocasión idónea para presentar e discutir, dende distintos enfoques, as visións e interpretacións que a sociedade española actual manexa dun pasado incómodo e a dimensión ética do seu coñecemento, pero tamén para debater sobre a necesidade dun novo relato sobre ese pasado e mais sobre os elementos dispoñibles para construílo.

Xa que logo, trátase de analizar ese relato herdado, baseado na idea de reconciliación da Transición pero construído sobre as razóns dos combatentes no conflito, as memorias fragmentadas de vítimas e verdugos, a propaganda do vencedor e a amargura do perdedor. Tamén, de contrastalo e deconstruílo, de confrontalo con outras memorias -subalternas en relación ao relato social dominante-, e co novo caudal de coñecemento histórico e memorialístico, así como cos novos paradigmas que operan nos estudos literarios e culturais. A 80 anos do golpe, a 40 desta nosa democracia de hoxe. Servíndonos da ollada externa e a comparanza, e afrontando a dimensión ética do coñecemento do pasado.

Audio da conferencia "A catástrofe: un entronque analítico da literatura coa historia" de Joan Ramón Resina

Xa se pode escoitar (e/ou descargar)a conferencia "A catástrofe: un entronque analítico da literatura coa historia" de Joan Ramón Resina (Stanford University, USA). incluída no ciclo "Pasados incómodos: guerra, memoria e historia", que organizou Histagra o martes 25 de novembro de 2014. 

Los Libros de la Catarata publica 'Otras miradas sobre golpe, guerra y dictadura', volume colectivo dirixido por Lourenzo Fernández Prieto e Aurora Artiaga Rego do Grupo HISTAGRA.

A preocupación nuclear de Otras miradas sobre golpe, guerra y dictadura atópase no fío deste relato: Sabemos pouco do pasado e boa parte do que sabemos é mentira. Temos unha inmensa memoria dun pasado incómodo. Que facer con esa memoria era o que non sabía a xeración da Transición. Revisitar ese pasado é o labor dunha xeración de historiadores e historiadoras desde hai dúas décadas, coincidindo co proceso coñecido como "recuperación da memoria histórica". Mais a narración colectiva dese pasado incómodo de golpe, guerra e dictadura mantívose conxelado nos relatos franquistas-antifranquistas pasados pola peneira da reconciliación da Transición.

Audio da presentación de "Otras miradas sobre golpe, guerra y dictadura"

Xa se pode escoitar (e/ou descargar) na canle de Histagra en iVoox, as intervencións de Aurora Artiaga, Lourenzo Fernández Prieto e Daniel Lanero Táboas do libro Otras miradas sobre golpe, guerra y dictadura, realizada na Facultade de Xeografía e Historia.

Unha conferencia Díaz Gómez inaugura a segunda edición do Ciclo "Pasados incómodos: Guerra, Memoria e Historia

O profesor José Luis Díaz Gómez, investigador titular do Departamento de Historia e Filosofía da Medicina, UNAM e membro da Academia Mexicana de la Lengua, inaugura o próximo martes 23 de setembro, o Máster de Historia Contemporánea cunha conferencia titulada Vida e asasinato do médico republicano d'O Inicio: a lembranza individual, o imaxinario rexional e a memoria histórica, coa que se inicia igualmente a segunda edición do Ciclo "Pasados incómodos: Guerra, Memoria e Historia”. A conferencia será na aula 13 da Facultade de Xeografía e Historia ás 12 horas.